గాసిప్ సినిమా రివ్యూ : 

ఆర్టిస్టులు: రాశి సింగ్, మహేష్ యడ్లపల్లి, విజయ్ అదిరాజు, రవి వర్మ, గురు చరణ్, 30 ఇయర్స్ పృథ్వీరాజ్ తదితరులు
సినిమాటోగ్రఫీ: సతీష్,
మ్యూజిక్: శక్తికాంత్ కార్తీక్,
స్టోరీ & డైరెక్షన్: వైభవ్ కౌండిన్య,
ప్రొడ్యూసర్: యతి రేమెళ్ల,

ఎంటర్టైన్మెంట్ న్యూస్ ఫాలో అయ్యేవాళ్ళకు ‘గాసిప్’ వర్డ్ బాగా తెలుసు. గాసిప్ అంటే న్యూస్ అనుకుంటారు కొందరు. ఎంటర్టైన్మెంట్ అనుకుంటారు ఇంకొందరు. కానీ, గాసిప్ అంటే లేనిపోనిది సృష్టించడం. ‘గాసిప్’ టైటిల్‌కు తగ్గట్టుగా ఈ సినిమా అంతా లేనిపోనివి సృష్టించడంతో అమ్మాయి జీవితం ఎలా మారిందనే అంశం చుట్టూ తిరుగుతుంది. మహేష్ యడ్లవల్లి, రాశి సింగ్ జంటగా నటించిన ‘గాసిప్’ జూన్ 26న థియేటర్లలో విడుదలైంది. ఈ సినిమా ఎలా ఉందో రివ్యూ చదివి తెలుసుకోండి.

కథ పరిశీలిస్తే :

అజంతా (రాశి సింగ్) మిడిల్ క్లాస్ అమ్మాయి. బిడ్డకు జన్మనిస్తూ తల్లి మరణిస్తుంది. ఆమెను అల్లారుముద్దుగా పెంచుతాడు తండ్రి రమేష్ (విజయ్ ఆదిరాజు). అజంతా కూడా పద్ధతిగా ఉంటుంది. ప్రేమిస్తున్నానని తేజ (మహేష్ యడ్లవల్లి) వెంట పడుతున్నా ఎక్కడా హద్దులు దాటదు. తండ్రికి చెప్పకుండా ఓ రాత్రి స్నేహితురాళ్ళతో పార్టీకి వెళుతుంది. అక్కడ తాగిన మత్తులో ఒకరి భుజంపై వాలుతుంది. అది వీడియో చూసి లేనిపోని పుకార్లు సృష్టిస్తారు కాలనీలో కుర్రాళ్ళు. అవి అజంతా మేనమామ ప్రకాశం (రవి వర్మ) చెవిన పడతాయి. ఆ తర్వాత ఏమైంది? అనేది సినిమా.

కధనం, దర్శకత్వ విశ్లేషణ:

మాటలతో ఒకరి క్యారెక్టర్‌ను చంపేసే ‘గాసిప్‘ సంస్కృతిపై దర్శకుడు వైభవ్ కౌండిన్య సంధించిన బాణం ఈ సినిమా. ఆయన ప్రయత్నం నిస్సందేహంగా అభినందనీయం. అలాగే ఆయన కథ, కథనం, సంభాషణలు తప్పకుండా ఆలోచింపజేస్తాయి.

దర్శకుడు వైభవ్ కౌండిన్య కథను చెప్పిన విధానం ఆకట్టుకుంటుంది. అనవసరమైన కమర్షియల్ అంశాల కోసం ఆయన కథను పక్కదారి పట్టించలేదు. ప్రతి పాత్రకు కథలో స్పష్టమైన ప్రాధాన్యం ఉంది. ముఖ్యంగా ఇతరుల మాటలు నమ్మి కొంత మంది ఎంత పెద్ద తప్పు చేస్తారో ఎంతో సహజంగా చూపించారు. మహిళల గురించి నోటికి వచ్చింది వాగడం ఎంత ప్రమాదకరమో చూపించారు. ఫేక్ ఆస్ట్రాలజర్స్ మీద కూడా సెటైర్స్ వేశారు.

సాంకేతిక వర్గ విశ్లేషణ: 

టెక్నికల్‌గా కూడా సినిమా బాగుంది. శక్తికాంత్ కార్తీక్ సంగీతంలో యూత్ ఎంజాయ్ చేసే సాంగ్స్ ఉన్నాయి. ఆర్ఆర్ కథకు సెట్ అయ్యింది. సతీష్ సినిమాటోగ్రఫీ, జై కుమార్ ఎడిటింగ్ కథకు అవసరమైన రిథమ్‌ను కొనసాగించాయి. పరిమిత బడ్జెట్‌లోనూ నిర్మాణ విలువల్లో నాణ్యత చూపించాయి.

నటి నటులు ప్రతిభ: 

రాశి సింగ్ నటన సినిమాకు ప్రధాన బలం. భావోద్వేగ సన్నివేశాల్లో ఆమె ఎంతో సహజంగా కనిపించారు. తండ్రి మరణించిన సన్నివేశంలో, భర్త చేతిలో చెంప దెబ్బ తిన్న సన్నివేశంలో మెచ్యూరిటీ చూపించారు.

మహేష్ యడ్లపల్లి, గురు చరణ్ పాత్రలు చూస్తే… సొసైటీలో అటువంటి కుర్రాళ్ళు కనిపిస్తారు. రవి వర్మ, విజయ్ ఆదిరాజు తమ అనుభవంతో మెప్పించారు.

పృథ్వీరాజ్ పోషించిన నకిలీ స్వామిజీ పాత్ర నవ్వులు పూయిస్తుంది. అలాగే, మూఢ నమ్మకాలతో పాటు తప్పుడు జాతకాలు చెప్పే వాళ్ళపై స్ట్రాంగ్ సెటైర్ వేసింది.

18F మూవీస్ టీం ఒపీనియన్:

సామాజిక బాధ్యతతో తీసిన సినిమా ‘గాసిప్’. పుకార్లు (గాసిప్స్) నమ్మడం ఎంత ప్రమాదకరమో… ముఖ్యంగా ఆడపిల్లల జీవితాలపై వాటి ప్రభావం ఎంత తీవ్రంగా ఉంటుందో హృదయానికి హత్తుకునేలా చూపించింది. కుటుంబంతో కలిసి చూసేలా దర్శకుడు వైభవ్ కౌండిన్య తెరకెక్కించారు.

18F మూవీస్ రేటింగ్: 2.75 / 5